ನಿಮ್ಮಲ್ಲೇ ಅಗಾಧವಾದ ಶಕ್ತಿ ಇದೆ, ನಿಮ್ಮ ಸಾಮರ್ಥ್ಯದ ಮೇಲೆ ನಂಬಿಕೆ ಇರಲಿ ಅಷ್ಟೇ..

0
1284
believe-in-yourself

ಸಂತಸದ ಜೀವನ ನಮ್ಮ ಉದ್ದೇಶವಾದರೂ, ಅದಕ್ಕಾಗಿ ನಮ್ಮೆಲ್ಲ ಪ್ರಯತ್ನಗಳು ಸಮರೋಪಾದಿಯಲ್ಲಿ ಸಾಗಿದರೂ ದುಃಖ, ನೋವು, ನಿರಾಸೆ ಹಾಗೂ ಹತಾಶೆಗಳು ನಮ್ಮನ್ನು ಕಾಡದೆ ಬಿಡುವು. ದುಃಖ ಯಾರಿಗೂ ಬೇಡ, ನೋವು ಯಾರಿಗೂ ಬೇಡ. ಆದರೂ ನಮ್ಮ ಬದುಕಿನಲ್ಲಿ ಅವು ಘಟಿಸುತ್ತಲೇ ಇರುತ್ತವೆ. ಕಾರಣವೇನು?

ಈ ಪ್ರಶ್ನೆಯನ್ನಿಟ್ಟುಕೊಂಡು ತತ್ವಜ್ಞಾನಿಗಳು, ಮನೋವಿಜ್ಞಾನಿಗಳು, ಧಾರ್ಮಿಕರೂ ಹಾಗೂ ಇತರರು ಬಹಳಷ್ಟು ಚಿಂತನ-ಮಂಥನ ನಡೆಸಿದ್ದಾರೆ. ಭಿನ್ನಭಿನ್ನ ನೆಲೆಯ ಉತ್ತರಗಳನ್ನು ಕಂಡುಕೊಂಡಿದ್ದಾರೆ. ಅವುಗಳನ್ನು ಪುಸ್ತಕಗಳ ಮೂಲಕ, ಉಪನ್ಯಾಸಗಳ ಮೂಲಕ ಜನ ಸಾಮಾನ್ಯರಿಗೆ ತಲುಪಿಸಿದ್ದಾರೆ. ಆದರೂ ಜಗತ್ತು ದುಃಖದಿಂದ, ನೋವುಗಳಿಂದ ತತ್ತರಿಸಿದೆ. ಇದಕ್ಕೆ ಕಾರಣವೇನು?

ಬಯಕೆಗಳು ನಮ್ಮ ಬದುಕಿನ ಚಾಲನಾ ಶಕ್ತಿಗಳಾಗಿವೆ. ಬಯಕೆಗಳು ಅತಿಯಾದಷ್ಟು ಪ್ರಯತ್ನವೂ ಅತಿಯಾಗಬೇಕು. ಬಯಕೆಗಳು ನಮ್ಮ ಆಶಯದಂತೆ ಈಡೇರಿದರೆ ನಮ್ಮ ಸಂತಸ ಹಿಗ್ಗುತ್ತದೆ. ಬಯಕೆಗಳು ಕೈಗೂಡದಿದ್ದಲ್ಲಿ ದುಃಖ ಆವರಿಸುತ್ತದೆ. ಬಯಕೆ ಎಷ್ಟು ಆಳವಾಗಿರುತ್ತದೆ ದುಃಖವು ಅಷ್ಟೇ ಆಳವಾಗಿರುತ್ತದೆ. ನಮ್ಮ ಗುರಿ ಬಯಕೆಯಿಂದ ಸಂತಸದೆಡೆಗೆ. ಇದು ಎಲ್ಲಾ ಬಾರಿಯೂ ಸಲ್ಲುವುದಿಲ್ಲ. ಬಹಳಷ್ಟು ಬಾರಿ ಬಯಕೆಗಳು ದುಃಖಕ್ಕೂ ಈಡುಮಾಡುತ್ತವೆಂಬ ಸತ್ಯ ಅರಿವಾಗುವುದೇ ಇಲ್ಲ. ಅರಿವಾಗಿದ್ದರೂ ಜಾಣಕುರುಡರಾಗುತ್ತೇವೆ. ಆದಾಗ್ಯೂ ನಾವು ಬಯಕೆಯ ಬೆನ್ನೇರಿ ದುಃಖದ ಪಾತಾಳಕ್ಕೆ ಬೀಳುತ್ತೇವೆ.
ಹಾಗಾದರೆ ಬಯಕೆಗಳು ಬೇಡವೇ? ಬಯಸುವುದು ತಪ್ಪೇ? ಎಂದು ಮನಸ್ಸು ಕೇಳುತ್ತದೆ.

ಬುದ್ಧ ಹೇಳುತ್ತಾರೆ ನಿಮ್ಮ ಆಸೆಗಳು ಎಷ್ಟೋ ಕಡಿಮೆ ಇರುತ್ತದೂ ಆನಂದ ಅಷ್ಟೂ ಹೆಚ್ಚು ಇರುತ್ತದೆ ಎಂದು. ಬಯಕೆ ತಪ್ಪೆಯೇ ಸರಿಯೋ ಎಂಬುದಕ್ಕಿಂತ ಏನನ್ನು ಬಯಸುತ್ತಿದ್ದೇವೆ? ಏಕೆ ಬಯಸುತ್ತಿದ್ದೇವೆ ಎಂಬ ಪ್ರಶ್ನೆ ಹೆಚ್ಚು ಪ್ರಸ್ತುತ. ಕಾರಣ ಬಹಳಷ್ಟು ಬಾರಿ ನಮಗೆ ಏನನ್ನು ಬಯಸಬೇಕೆಂಬ ಸ್ಪಷ್ಟತೆಯಿರುವುದಿಲ್ಲ. ಹಾಗಾಗಿ ಬಯಸುವ ಮುನ್ನ ನಮ್ಮ ಬಯಕೆಗಳನ್ನು ಪರಿಶೀಲಿಸಿಕೊಳ್ಳಬೇಕು.

ಇನ್ನು ಬಯಕೆಯಿಂದಾಗುವ ಪರಿಣಾಮಗಳ ಬಗ್ಗೆ ಅರಿವು. ಬಯಕೆಯ ಈಡೇರಿಕೆ ಸಂತಸವನ್ನು ಇಲ್ಲವಾದಲ್ಲಿ ದುಃಖವನ್ನು ನಮ್ಮಲ್ಲಿ ಉಂಟುಮಾಡುತ್ತದೆ. ವಾಸ್ತವದಲ್ಲಿ ಒಂದು ಘಟನೆಯಿಂದ ಸಂತಸವಾಗಲಿ ದುಃಖವಾಗಲಿ ಸಂಭವಿಸುವುದಿಲ್ಲ. ಬದಲಿಗೆ ಆ ಘಟನೆಯ ಬಗ್ಗೆ ನಮ್ಮ ದೃಷ್ಠಿಕೋನ, ನಂಬಿಕೆ ಅಥವಾ ಗ್ರಹಿಕೆ ನಮ್ಮಲ್ಲಿ ಸಂತಸವನ್ನೋ, ದುಃಖವನ್ನೊ ಮತ್ತಿನ್ನೇನನ್ನೋ ಉಂಟುಮಾಡುತ್ತದೆ. ಅಂದರೆ ಒಂದು ಘಟನೆಗೆ ಪ್ರತಿಕ್ರಿಯೇ ನೀಡುವ ಆಯ್ಕೆ ನಮ್ಮಲ್ಲಿದೇ ಎಂದಾಯ್ತು. ಹಾಗಾದಲ್ಲಿ ನಮ್ಮ ಬದುಕಿನಲ್ಲಿ ದುಃಖ ಅಥವಾ ಸಂತಸವನ್ನು ತಂದುಕೊಳ್ಳುವ ಆಯ್ಕೆಯೂ ನಮ್ಮಲ್ಲಿದೆ.

ಲಾವೋತ್ಸು ಹೇಳುತ್ತಾರೆ ‘ಜೀವಿಸಿರಿ, ಆದರೆ ನಿಮ್ಮ ಬಯಕೆಗಳಿಗೆ ಜೀವಿಸಲು ಬಿಡಬೇಡಿ’ ಆದರೆ ವಾಸ್ತವದಲ್ಲಿ ನಮ್ಮ ಜೀವನಕ್ಕಾಗಿ ಬಯಕೆಗಳಿಲ್ಲ, ಬದಲಿಗೆ ಜೀವನ ಬಯಕೆಗಳಿಗಾಗಿ ಇದೆ. ಇದರಿಂದಾಗಿ ದುಃಖ, ನೋವು, ಆತ್ಮಹತ್ಯೆಗಳು ಜಗತ್ತನ್ನು ಅವರಿಸಿವೆ. ಜಗತ್ತು ಬದಲಾಗಬೇಕೆಂದರೆ ನಾವು ಬದಲಾಗುವುದೊಂದೇ ದಾರಿ.