ಎಳ್ಳು ಅಮವಾಸ್ಯೆಯಂದು ರೈತರು ಭೂಮಿತಾಯಿಯನ್ನು ಏಕೆ ಆರಾಧಿಸುತ್ತಾರೆ ಗೊತ್ತ..??

0
892

ಇಂದು ರೈತರ ಆರಾಧ್ಯದೇವತೆ ಭೂಮಿ ತಾಯಿಗೆ ಎಳ್ಳು ಅಮಾವಾಸ್ಯೆ ದಿನ. ಹಚ್ಚಹಸಿರಿನ ಸೀರೆಯನ್ನು ಉಟ್ಟ ಭೂತಾಯಿಯ ಆರಾಧನೆ, ಹೊಲದಲ್ಲಿ ಸಾಮೂಹಿಕ ಪೂಜೆ ಮತ್ತು ಭೋಜನ ಸವಿದು ರೈತರು ಸಡಗರ ಸಂಭ್ರಮದಿಂದ ಭೂತಾಯಿಯ ಪ್ರಾರ್ಥಿಸುವ ಪರಂಪರೆಯ ಪ್ರತೀಕದ ಹಬ್ಬವೇ ಈ ಎಳ್ಳು ಅಮಾವಾಸ್ಯೆ. ಅದರಲ್ಲೂ ಉತ್ತರಕರ್ನಾಟಕ ಭಾಗದಲ್ಲಿ ಪ್ರತಿ ವರ್ಷವೂ ಎಲ್ಲರ ಹೊಲ ಗದ್ದೆಗಳಲ್ಲಿ ಎಳ್ಳು ಅಮಾವಾಸ್ಯೆಯ ದಿನವನ್ನು ಸಡಗರ ಸಂಭ್ರಮದಿಂದ ಆಚರಿಸುತ್ತಾರೆ.

ಎಳ್ಳು ಅಮವಾಸ್ಯೆ 3-4 ದಿನ ಇರುವಾಗಲೇ ರೈತರ ಮನೆಗಳಲ್ಲಿ ಹಬ್ಬದ ತಯಾರಿ ನಡೆಯುತ್ತದೆ. ಹೊಲದಲ್ಲಿ ಬೆಳೆದು ನಿಂತಿರುವ ಹಿಂಗಾರು ಪೈರುಗಳಿಗೆ ಪೂಜೆ ಸಲ್ಲಿಸುವುದರೊಂದರಿಗೆ ಭೂಮಿತಾಯಿಗೆ ಚೆರಗ ಚೆಲ್ಲುವುದು ಈ ಹಬ್ಬದ ವಿಶೇಷ. ಬೆಳಗ್ಗೆಯಿಂದಲೇ ಸುಮಂಗಲೆಯರು ತಮ್ಮ ಮನೆಗಳಲ್ಲಿ ಇಂದು ಬೆಳಿಗ್ಗೆ ಮನೆ ಶುಚಿಗೊಳಿಸಿ ಪೂಜೆ ಪುನಸ್ಕಾರದೊಂದಿಗೆ ಮನೆಗಳಲ್ಲಿ ವಿವಿಧ ಖಾದ್ಯಗಳನ್ನು ತಯಾರಿಸುತ್ತಾರೆ.

ಇಂದು ಎಲ್ಲರ ಮನೆಯಲ್ಲಿ ಮಾಡುವ ವಿಶೇಷ ಖಾದ್ಯಗಳಿಗೆ ಕೊನೆಯಿಲ್ಲ. ಕಡಕ್ ರೊಟ್ಟಿ, ಅಗಸಿ ಹಿಂಡಿ, ಶೇಂಗಾ ಚಟ್ನಿ, ಗುರೆಳ್ಳ ಚಟ್ನಿ, ಮೊಸರು ಹೋಳಿಗೆ, ಕಡಬು, ಖರ್ಜಿ ಕಾಯಿ, ಸೆಂಡಿಗೆ, ಸಜ್ಜೆ ರೊಟ್ಟಿ, ವಿವಿಧ ತರಹದ ಹಿಂಡಿ, ವಿವಿಧ ಕಾಳು ಪಲ್ಯೆ, ಬದನೆಕಾಯಿ ಎಣ್ಣೆಗಾಯಿ, ಅಂಬಲಿ, ಜೋಳದ ಅನ್ನ ಹೀಗೆ ಹಲವಾರು ತರಹದ ರುಚಿ ಕಟ್ಟಾದ, ಗಮಗಮಿಸುವ ಅಡುಗೆ ತಯಾರಿಸಿ ದೊಡ್ಡ ಬುತ್ತಿಯ ಗಂಟು ಕಟ್ಟಿಕೊಂಡು ಕುಟುಂಬದವರೆಲ್ಲರೂ ಎತ್ತಿನ ಬಂಡಿಯಲ್ಲಿ ಕುಳಿತು ಹೊಲಕ್ಕೆ ಹೋಗುವುದು ದೊಡ್ಡ ಸಡಗರದಂತೆ ಕಾಣುತ್ತದೆ. ನಂತರ ಹೊಲ-ಗದ್ದೆಗೆ ಹೋಗಿ ಭೂತಾಯಿಗೆ ನಮಸ್ಕರಿಸಿ ರೈತಜೀವಗಳು ಪ್ರಾರ್ಥಿಸುವ ಭಕ್ತಿಭಾವ ಪ್ರತೀಕದ ಹಬ್ಬ ಇದಾಗಿದೆ. ಅಲ್ಲದೇ ಪಾಂಡವರಿಗೆ ಮತ್ತು ಲಕ್ಷ್ಮೀಗೆ ನೈವೇದ್ಯ ಅರ್ಪಿಸಿ ಬೆಳೆಗೆ ಯಾವುದೇ ರೋಗ ಬಾಧೆಯಾಗದೇ ಉತ್ತಮ ಫಸಲು ಬರಲಿ ಎಂದು ಪ್ರಾರ್ಥಿಸಲಾಗುತ್ತದೆ.

ಸಾಮೂಹಿಕ ಭೋಜನದ ಹಿನ್ನೆಲೆ

ಒಂದಾನೊಂದು ಕಾಲದಲ್ಲಿ ಎಳ್ಳು ಅಮಾವಾಸ್ಯೆ ದಿನದಂದು ಮಾರುವೇಷದ ಹೆಣ್ಣು ದೇವತೆ ರೈತನೊಬ್ಬನ ಹೊಲಕ್ಕೆ ಬಂದು ಊಟಬಡಿಸಲು ಕೇಳಿದಾಗ, ಆ ರೈತ ಊಟ ಮಾಡಿಸದೇ ಕಳುಹಿಸಿದ್ದಕ್ಕೆ ಅವಳ ಕಾಡಿಗೆ ಕಣ್ಣುಗಳಿಂದ ಕಣ್ಣೀರು ಹರಿದು ಭೂಮಿಗೆ ಬಿದ್ದಿತು. ಇದರ ಪರಿಣಾಮದಿಂದ ಮರುದಿನ ಆ ಭೂಮಿಯಲ್ಲಿನ ಜೋಳದ ತೆನೆಗಳೆಲ್ಲಾ ಕಾಡಿಗೆ ತೆನೆಗಳಾಗಿದ್ದವು ಹೀಗಾಗಿ ಈ ಹಬ್ಬದ ದಿನ ಹೊಲಕ್ಕೆ ಬಂದವರಿಗೆಲ್ಲ ಊಟ ಮಾಡಿಸುವದು, ತಾವೂ ತಂದಿದ್ದ ನೈವೇದ್ಯ ಖಾದ್ಯಗಳನ್ನು ಹೊಲದ ತುಂಬೆಲ್ಲಾ ಚರಗ ಚೆಲ್ಲುವ ಸಂಪ್ರದಾಯ ಪ್ರಾಚೀನ ಕಾಲದಿಂದ ವಾಡಿಕೆಯಾಗಿ ಬಂದಿದೆ. ಅದರ ಜೊತೆ ಜೊತೆಗೆ ಈ ಎಳ್ಳು ಅಮಾವಾಸ್ಯೆ ದಿನದಂದು ವಾಡಿಕೆಯಂತೆ ಕುಟುಂಬದವರೆಲ್ಲ ಹೊಲಕ್ಕೆ ಬಂದು ಸಾಮೂಹಿಕ ಊಟ ಮಾಡುವರು.