ಕೇಳಿದ ವರವನ್ನು ಪ್ರಸಾದ ಮೂಲಕ ಪವಾಡ ರೀತಿ ಕೊಡುವ ಈ ಹಾಲುರಾಮೆಶ್ವರ ಕ್ಷೇತ್ರಕ್ಕೆ ನೀವು ಒಮ್ಮೆ ಭೇಟಿ ಕೊಡಲೇಬೇಕು..!!

0
3001

ಇದೊಂದು ಹಲವು ವಿಸ್ಮಯಗಳನ್ನು ಅವಿತಿಟ್ಟುಕೊಂಡಿರುವ ಸ್ಥಳ. ಆಶ್ಚರ್ಯವೆನಿಸಿದರೂ ಅಗೋಚರ ಶಕ್ತಿ ಇಲ್ಲಿದೆ. ಇಲ್ಲಿನ ಗಂಗೆಯಲ್ಲಿ ಭಕ್ತರು ಕೇಳಿದ ಕೋರಿಕೆಗಳಿಗೆ ಪ್ರಸಾದ ಮೂಲಕ ಉತ್ತರ ಸಿಗುತ್ತದೆ. ಅಸಾಮಾನ್ಯವಾದ ಪವಾಡಗಳನ್ನು ಹೊಂದಿರುವ ಅದ್ಭುತ ಸ್ಥಳ. ಈ ಕಲಿಗಾಲದಲ್ಲೂ ಪವಾಡ ಸೃಷ್ಟಿಮಾಡುತ್ತಿರುವ ಹಿಂದೂ ಧಾರ್ಮಿಕ ಕ್ಷೇತ್ರ ಚಿತ್ರದುರ್ಗ ಜಿಲ್ಲೆಯಲ್ಲಿದೆ. ಆ ಪುಣ್ಯ ಸ್ಥಳದ ಹೆಸರು ಹಾಲು ರಾಮೇಶ್ವರ ಕ್ಷೇತ್ರ, ದೇವಪುರ. ಚಿತ್ರದುರ್ಗದಿಂದ ಸುಮಾರು ೫೦ ಕಿಮೀ ದೂರದಲ್ಲಿ, ಹೊಸದುರ್ಗ ತಾಲ್ಲೂಕಿನಿಂದ ೧೨ ಕಿ.ಮೀ. ದೂರದಲ್ಲಿದೆ.

ಈ ಪ್ರದೇಶವನ್ನು ಪುರಾಣಗಳಲ್ಲಿ ಚಿಮ್ಮುಲಾದ್ರಿ, ಹಿಡಂಬಿವನ ಎಂಬ ಹೆಸರಿನಿಂದ ಕರೆಯಲಾಗುತಿತ್ತು. ಕರ್ನಾಟಕ ರಾಜ್ಯದ ನಾನಾ ಭಾಗಗಳಿಂದ ಮತ್ತು ಬೇರೆ ರಾಜ್ಯಗಳಿಂದಲೂ ಶ್ರದ್ಧಾಳುಗಳು ಈ ಕ್ಷೇತ್ರಕ್ಕೆ ಬರುತ್ತಾರೆ. ತ್ರೇತಾಯುಗದಲ್ಲಿ ಶ್ರೀರಾಮಚಂದ್ರನ ಕೈಯಿಂದ ಪ್ರತಿಷ್ಠೆಯಾಗಿದೆ, ಎಂದು ಹೇಳಲಾದ ಶಿವಲಿಂಗ, ‘ಉದ್ಭವ ಮೂರ್ತಿ’ಎಂದು ಜನ ನಂಬುತ್ತಾರೆ. ದೇವಾಲಯದ ಮುಂದೆ ‘ನಂದಿ ಮೂರ್ತಿ’ಯನ್ನೂ ನಾವು ಕಾಣಬಹುದು. ‘ಗಂಗಾ ಕೊಳ’ ಇಲ್ಲಿಯ ವಿಶೇಷ. ನಿತ್ಯ ಬೆಳಿಗ್ಗೆ 7. 30ರಿಂದ ಸಂಜೆ 7. 30ರವರೆಗೆ ವಿಶೇಷ ಪೂಜಾ ಕೈಂಕರ್ಯ ನಡೆಯುತ್ತದೆ. ಇಲ್ಲಿಗೆ ಬರುವ ಭಕ್ತರು. ಭೇದವಿಲ್ಲದೆ ಎಲ್ಲರೂ ಭಕ್ತಿಯಿಂದ ದೇವರನ್ನು ಪೂಜಿಸುತ್ತಾರೆ. ಭಕ್ತರನ್ನು ಸೂಜಿಗಲ್ಲಿನಂತೆ ಆಕರ್ಷಿಸುತ್ತಿದೆ ಈ ದೇವಸ್ಥಾನ ದ್ರಾವಿಡರ ಶೈಲಿಯಲ್ಲಿ ನಿರ್ಮಾಣವಾಗಿದೆ.

ವಾಲ್ಮೀಕಿ ಮಹರ್ಷಿಗಳ ಪತ್ನಿ, ‘ಸುದತಿದೇವಿ’ ಕಾಶಿಯಲ್ಲಿ ಗಂಗೆಗೆ ಬಾಗಿನ ರೂಪದಲ್ಲಿ ಸಮರ್ಪಿಸಿದ ವಜ್ರಖಚಿತ ಕಡಗ, ಈ ಊರಿನ ಹುತ್ತದಲ್ಲಿ ದೊರಕಿದಾಗ ಅಲ್ಲಿ ಗಂಗೋದ್ಭವವೂ ಆಯಿತು ಎಂಬ ನಂಬಿಕೆ ಪ್ರಚಲಿತದಲ್ಲಿದೆ. ಈ ವಿಷಯ ತಿಳಿದ ವಾಲ್ಮೀಕಿ ಮಹರ್ಷಿಗಳು ಇದೆ ಮುಹೂರ್ತದಲ್ಲಿ ಶ್ರೀ ರಾಮನಿಂದ ಪೂಜಿಸಲ್ಪಟ್ಟ ಈಶ್ವರ ಲಿಂಗಕ್ಕೆ ಅಭಿಷೇಕ ಮಾಡುತ್ತಾರೆ. ಅದೇ ಜಾಗದಲ್ಲಿ ಮಹರ್ಷಿಗಳ ಮುಂದೆ ಗಂಗೆಯು ಉದ್ಭವಿಸಿ ಹರಿಯಲಾರಂಭಿಸುತ್ತಾಳೆ. ಆಗ ವಾಲ್ಮೀಕಿ ಮಹರ್ಷಿ ಉತ್ತರ ದಿಕ್ಕಿಗೆ ಎರಡು ಹೊಂಡಗಳನ್ನು ನಿರ್ಮಾಣ ಮಾಡಿಸಿ ಹರಿದು ಬಂದ ಜಲದಿಂದ ಯಮುನಾ ಹಾಗು ಸರಸ್ವತಿಯನ್ನು ಅಹ್ವಾನ ಮಾಡುತ್ತಾರೆ. ಅವರೇ ಪ್ರತಿಷ್ಠಾಪಿಸಿದ ಲಿಂಗವನ್ನು ಪರಮೇಶ್ವರ ಎಂದು ಮತ್ತು ಗಂಗೆಯು ಶುಭ್ರ ಮತ್ತು ಹಾಲಿನಂತೆ ವರ್ಣವಿದ್ದುದ್ದರಿಂದ ಈ ಕ್ಷೇತ್ರ ಕ್ಷೀರ ರಾಮೇಶ್ವರ ಎಂದು ಪ್ರಸಿದ್ದಿ ಪಡೆಯುವಂತೆ ವಾಲ್ಮೀಕಿ ಮಹರ್ಷಿಗಳು ಸಂಕಲ್ಪ ಮಾಡಿದ್ದರು. ಆಗ ಹಾಲಿನ ಬಣ್ಣದ ನೀರು ಉದ್ಭವಿಸಿದ ಈ ಕ್ಷೇತ್ರಕ್ಕೆ ‘ಹಾಲು ರಾಮೇಶ್ವರ’ ಎಂದು ನಾಮಕರಣ ಮಾಡಿದರು ಎನ್ನುತ್ತಾರೆ. ಈ ಕ್ಷೇತ್ರದಲ್ಲಿ ಗಂಗೆ ಆವಿರ್ಭವಿಸಲು ಕಾರಣರಾದ ವಾಲ್ಮೀಕಿ ಮಹರ್ಷಿಗಳ ಪತ್ನಿ, ‘ಸುದತಿದೇವಿ’ಯವರ ವಿಗ್ರಹವೂ ಕೂಡ ಇಲ್ಲಿ ಕಾಣಬಹುದು.

ಈ ಗಂಗೆಯನ್ನು ಗುಪ್ತ ಗಾಮಿಯಾಗಿಸಲು ಮಹರ್ಷಿಗಳು ಇದೆ ಜಗದಲ್ಲಿ ಕೆಲಕಾಲ ಧ್ಯಾನಸ್ಥರಾಗಿದ್ದರು ಎಂಬುವುದು ಇಲ್ಲಿನ ಐತಿಹ್ಯ. ಇಲ್ಲಿಗೆ ಬಂದ ಭಕ್ತರು ಮೊದಲು ಗಂಗಾಮಾತೆಗೆ ವಂದಿಸಿ, ಕೊಳದಲ್ಲಿ ಸ್ನಾನಮಾಡಿ, ತಮ್ಮ ಮನಸ್ಸಿನಲ್ಲಿ ಕೋರಿಕೊಳ್ಳುತ್ತಾರೆ. ಗಂಗಾ ಕೊಳದಲ್ಲಿ ಮಿಂದು ಪೂಜೆ ಸಲ್ಲಿಸುವ ಮೂಲಕ ತಮ್ಮ ಇಷ್ಟಾರ್ಥ ಸಿದ್ಧಿಯಾಗುವುದೇ, ಎಂದು ದೇವರಲ್ಲಿ ಕೇಳಿಕೊಳ್ಳುತ್ತಾರೆ. ಫಲದ ರೀತಿಯಲ್ಲಿ ಕೊಳದ ನೀರಿನ ಮೇಲೆ ತೇಲಿಬರುವ ನಾನಾ ವಸ್ತುಗಳನ್ನು ಕಂಡ ಬಳಿಕ, ಅಲ್ಲಿನ ಅರ್ಚಕರು ಅದರ ಬಗ್ಗೆ ಸಿದ್ಧಿಫಲವನ್ನು ತಿಳಿಯ ಹೇಳುತ್ತಾರೆ. ಯಾರು ಬೇಡಿಕೊಳ್ಳುತ್ತಾರೋ ಅವರ ಫಲಗಳನ್ನು ಸ್ವೀಕರಿಸಬೇಕು. ಒಂದು ಸಂದರ್ಭದಲ್ಲಿ ಬೇರೆಯವರು ಫಲಗಳನ್ನು ಪಡೆಯಲು ಹೋದರೆ ಅದು ಮುಳುವಾಗುತ್ತೆ. ಇದು ಯಕ್ಷಿಣಿಯಲ್ಲದಿದ್ದರು ಇಂದಿಗೂ ನೆಡೆಯುತ್ತಿರುವ ವಿದ್ಯಮಾನ.

ಭಕ್ತರ ಬೇಡಿಕೆಗೆ ತಕ್ಕ ಹಾಗೆ ನೀರಿನಲ್ಲಿ ತೇಲುತ್ತಾ ಕಾಣಿಸಿಕೊಳ್ಳುವ ವಸ್ತುಗಳು ಹಲವಾರು ಬಗೆಯವು. ವೀಳೆದೆಲೆ, ಹೂವು, ಹಣ್ಣು, ಕಾಯಿ, ಮೊಸರನ್ನ, ಬೆಳ್ಳಿಯ ನಾಣ್ಯ, ತೆಂಗಿನಕಾಯಿ, ಮೊದಲಾದವುಗಳು. ಇಲ್ಲಿಗೆ ಭೇಟಿನೀಡುವ ಭಕ್ತರ ಬಾಯಿಂದ “ಉದ್ಭವ ಗಂಗೆ” ಎಂದೇ ಕರೆಸಿಕೊಳ್ಳುವ ಪುಣ್ಯ ಸ್ಥಳವಾಗಿದ್ದು ಪ್ರತೀದಿನ ನೂರಾರು ಭಕ್ತಾಧಿಗಳು ಭೇಟಿನೀಡುತ್ತಾರೆ. ಮಕ್ಕಳಿಲ್ಲದವರು ಇಲ್ಲಿ ಭಗವಂತನಲ್ಲಿ ಹರಕೆ ಸಲ್ಲಿಸುತ್ತಾರೆ.

ಹಿಂದಿನ ಮೈಸೂರು ಸಂಸ್ಥಾನದ ಮಹಾರಾಜರಾಗಿದ್ದ ಶ್ರೀ ಜಯಚಾಮರಾಜೇಂದ್ರ ಒಡೆಯರು 1943ರಲ್ಲಿ ಇಲ್ಲಿ ಬಂದು ಗಂಗೆಯನ್ನು ಪೂಜಿಸಿ ಸಂತಾನ ಕರುಣಿಸುವಂತೆ ಕೋರಿದಾಗ, ಅವರಿಗೆ ಬೆಳ್ಳಿ ತೊಟ್ಟಿಲು ಬಂದಿತೆಂದೂ, ಆ ನಂತರವೇ ಶ್ರೀಕಂಠದತ್ತ ನರಸಿಂಹರಾಜ ಒಡೆಯರು ಜನಿಸಿದರೆಂದೂ ಸ್ಥಳೀಯ ಉಲ್ಲೇಖವಿದೆ ಎನ್ನುತ್ತಾರೆ. ಕರ್ನಾಟಕದಲ್ಲಿ ಏಕೈಕ ವಾಗಿರುವ ಅತ್ಯಂತ ಜನಪ್ರಿಯ ಗಂಗಫಲ ಕ್ಷೇತ್ರವಿದು. ವಾರಾಣಸಿಯಲ್ಲಿ ದೊರಕುವ ಪುಣ್ಯ ಸಂಪತ್ತು ಈ ಕ್ಷೇತ್ರದಲ್ಲಿ ಲಭಿಸುತ್ತೆ ಎನ್ನುವ ಪ್ರತಿತವಿದೆ.

Also read: ದಕ್ಷಿಣ ಕನ್ನಡ ಜಿಲ್ಲೆಯ ಈ ವಿಶಿಷ್ಟವಾದ ದೇವಸ್ಥಾನಕ್ಕೆ ಮಣ್ಣು ಮಾತ್ರ ಸಾಕು ನಿಮ್ಮ ಕಷ್ಟಗಳಿಗೆ ದೇವರು ಸ್ಪಂದಿಸುತ್ತಾನೆ…!! ಒಮ್ಮೆ ಭೇಟಿ ಕೊಡಿ..