ಕೊರೊನಾ ಸಂಕಷ್ಟದ ನಡುವೆಯೇ ಎಚ್1ಎನ್1 ಕಾಟ: 2,721 ಮಂದಿಗೆ ಸೋಂಕು..!

0
203

ಕೊರೊನಾ ಸೋಂಕಿಗೆ ದೇಶ ತತ್ತರಿಸಿರುವಾಗಲೇ 2,721 ಜನರಲ್ಲಿ ಎಚ್1ಎನ್1 ಸೋಂಕು ಕಾಣಿಸಿಕೊಂಡಿದ್ದು, ಜುಲೈ ವೇಳೆಗೆ ಭಾರತದಲ್ಲಿ ಈ ಜ್ವರದಿಂದ 44 ಜನರು ಅಸುನೀಗಿದ್ದಾರೆ.

ರಾಷ್ಟ್ರೀಯ ರೋಗ ನಿಯಂತ್ರಣ ಕೇಂದ್ರದ ಮಾಹಿತಿ ಪ್ರಕಾರ ಜುಲೈ 31ರವರೆಗೆ ಒಟ್ಟು 2,721 ಎಚ್‌1ಎನ್‌1 ಪ್ರಕರಣಗಳು ದೇಶದಲ್ಲಿ ವರದಿಯಾಗಿದ್ದು, ಇದರಲ್ಲಿ 44 ಜನರು ಅಸುನೀಗಿದ್ದಾರೆ. ಐದು ರಾಜ್ಯಗಳಲ್ಲಿ ಹೆಚ್ಚಿನ ಪ್ರಕರಣಗಳು ವರದಿಯಾಗಿದ್ದು, ಕರ್ನಾಟಕದಲ್ಲಿ ಗರಿಷ್ಠ ಪ್ರಕರಣಗಳು ದೃಢಪಟ್ಟಿವೆ.

ಕರ್ನಾಟಕದಲ್ಲಿ ಇಲ್ಲಿಯವರೆಗೆ 458 ಹಂದಿ ಜ್ವರ ಪ್ರಕರಣಗಳು ಖಚಿತಪಟ್ಟಿದ್ದರೆ, ತೆಲಂಗಾಣದಲ್ಲಿ 443, ದಿಲ್ಲಿಯಲ್ಲಿ 412, ತಮಿಳುನಾಡಿನಲ್ಲಿ 253 ಮತ್ತು ಉತ್ತರ ಪ್ರದೇಶದಲ್ಲಿ 252 ಪ್ರಕರಣಗಳು ವರದಿಯಾಗಿವೆ.

ಆರಂಭದಲ್ಲಿ ಹಂದಿಗಳಲ್ಲಿ ಕಂಡು ಬಂದಿದ್ದ ಈ ಜ್ವರಕ್ಕೆ ಹಂದಿ ಜ್ವರ ಎಂಬ ಹೆಸರೂ ಇದೆ. ಸದ್ಯ ಇದರು ಮನುಷ್ಯರಿಂದ ಮನುಷ್ಯರಿಗೆ ಹರಡುತ್ತಿದೆ. ಎಲ್ಲಾ ಜ್ವರಗಳಂತೆ ಇದರಲ್ಲಿಯೂ ಜ್ವರ, ಕೆಮ್ಮು, ಗಂಟಲು ನೋವು, ಮೈ ಕೈ ನೋವು ಕಾಣಿಸಿಕೊಳ್ಳುತ್ತದೆ. ಗರ್ಭಿಣಿಯರು, ಐದು ವರ್ಷದೊಳಗಿನ ಮಕ್ಕಳು, ಹಿರಿಯ ನಾಗರಿಕರು ಹಾಗೂ ಈಗಾಗಲೇ ಇತರ ಆರೋಗ್ಯ ಸಮಸ್ಯೆ ಎದುರಿಸುತ್ತಿರುವವರಲ್ಲಿ ಈ ರೋಗ ಕಾಣಿಸಿಕೊಂಡಲ್ಲಿ ಅದರ ಪರಿಣಾಮಗಳು ತೀವ್ರವಾಗಿರುತ್ತವೆ.

ಜನರು ಇದರ ಬಗ್ಗೆ ಎಚ್ಚರಿಕೆಯಿಂದ ಇರುವುದು ಅಗತ್ಯ. ಕಾರಣ ಕೊರೊನಾ ವೈರಸ್‌ ಮತ್ತು ಸ್ವೈನ್‌ ಫ್ಲೂ ಲಕ್ಷಣಗಳು ಹೆಚ್ಚು ಕಡಿಮೆ ಒಂದೇ ರೀತಿಯಲ್ಲಿವೆ. ಹಾಗಾಗಿ ರೋಗಿಯ ಲಕ್ಷಣಗಳನ್ನು ನೋಡಿ ಕೊರೊನಾ ಪರೀಕ್ಷೆಯ ಜೊತೆ ವೈದ್ಯರು ಇನ್‌ಫ್ಲುಯೆಂಜಾ ಪರೀಕ್ಷೆಗಳನ್ನೂ ನಡೆಸಬಹುದು.

ಈ ರೋಗದಿಂದಲೂ ದೂರ ಇರಲು ಕೈ ಸ್ವಚ್ಛತೆ ಮತ್ತು ಮಾಸ್ಕ್‌ ಧರಿಸುವುದು ಉತ್ತಮ ಎಂದು ಫೋರ್ಟಿಸ್‌ ಆಸ್ಪತ್ರೆಯ ಶ್ವಾಸಕೋಶ ತಜ್ಞ ಡಾ. ವಿಕಾಶ್‌ ಮೌರ್ಯ ಸಲಹೆ ನೀಡಿದ್ದಾರೆ.

ಕಳೆದ ಒಂದು ದಶಕದಲ್ಲಿ 15,119 ಮಂದಿ ಈ ಜ್ವರದಿಂದ ಬಳಲಿದ್ದು, 532 ಮಂದಿ ಮೃತಪಟ್ಟಿದ್ದರು. ಈ ವರ್ಷದ ಮೊದಲ ಮೂರು ತಿಂಗಳಲ್ಲಿ 400ಕ್ಕೂ ಅಧಿಕ ಮಂದಿ ಎಚ್‌1ಎನ್‌1 ಸೋಂಕಿತರಾಗಿ, ಮೂವರು ಮೃತಪಟ್ಟಿ ದ್ದರು. ಈ ವರ್ಷವೂ ಹೆಚ್ಚಿನ ಪ್ರಕರಣ ವರದಿಯಾಗುವ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದ ಆರೋಗ್ಯ ಇಲಾಖೆ, ಅಗತ್ಯ ಮುಂ ಜಾಗ್ರತೆ ವಹಿಸಲು ಮನವಿ ಮಾಡಿತ್ತು.

ಕಳೆದ ವರ್ಷ ಈ ವೇಳೆಗೆ 1,838 ಮಂದಿ ಸೋಂಕಿತರಾಗಿದ್ದರು. ವರ್ಷಾಂತ್ಯಕ್ಕೆ 96 ಮಂದಿ ಈ ಜ್ವರಕ್ಕೆ ಮೃತಪಟ್ಟಿದ್ದರು. ಈ ವರ್ಷ ಕೊರೊನಾ ಸೋಂಕಿನ ಭೀತಿಯಿಂದಾಗಿ ಪರಸ್ಪರ ಅಂತರ ಕಾಯ್ದುಕೊಳ್ಳುವಿಕೆ, ಮುಖಗವಸು ಬಳಕೆ, ಸ್ವಚ್ಛತೆಗೆ ಆದ್ಯತೆ, ಸೋಂಕು ನಿವಾರಕ ಸಿಂಪಡಣೆ ಸೇರಿದಂತೆ ವಿವಿಧ ಮುನ್ನೆಚ್ಚರಿಕೆ ಕ್ರಮಗಳನ್ನು ರಾಜ್ಯದಾದ್ಯಂತ ಕೈಗೊಳ್ಳ ಲಾಯಿತು. ಹೀಗಾಗಿ ರಾಜ್ಯದಲ್ಲಿ ಎಚ್‌1ಎನ್1‌ ನಿಯಂತ್ರಣಕ್ಕೆ ಬಂದಿದೆ ಎಂದು ಆರೋಗ್ಯ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.