ಎಲ್ಲರೂ ತಿಳಿದುಕೊಳ್ಳಬೇಕಾದ ‘ಓಂ’ಕಾರ ಒಳಾರ್ಥ!!!

0
3871

Kannada News | Karnataka Temple History

ಪ್ರಣವ ಅಥವಾ `ಓಂ’ ಕಾರವು ಹಿಂದು ಧರ್ಮದ ಪವಿತ್ರ ಚಿಹ್ನೆ ಎಂದೇ ವಿಶ್ವಮಾನ್ಯ. `ಪ್ರಣವ’ ಎಂದರೆ ಭಗವಂತನನ್ನು ಪ್ರಭಾವಪೂರ್ಣವಾಗಿ ಪೂಜಿಸುವುದು, ಸದಾ ಪರಿಶುದ್ಧವಾಗಿರುವುದೆಂದರ್ಥ. ವೇದ, ಉಪನಿಷತ್ತು, ಭಗವದ್ಗೀತೆಯಲ್ಲಿ ಪ್ರಣವವನ್ನು ಅತಿ ಶ್ರೇಷ್ಠವೆಂದು ಉಲ್ಲೇಖಿಸಲಾಗಿದೆ. ಇದನ್ನು ಶ್ರದ್ಧಾಭಕ್ತಿಯಿಂದ ಧ್ಯಾನಿಸಿದರೆ ಎಂಥಾ ದುರಂತಗಳಿಂದಲೂ ಪಾರಾಗಬಹುದೆಂದು ಹೇಳಲಾಗುತ್ತದೆ. ಹಾಗಾಗೇ ಎಲ್ಲ ಅಷ್ಟೋತ್ತರ ಮಂತ್ರಗಳ ಪ್ರಾರಂಭ `ಓಂ’ ಕಾರದಿಂದ.

ಕಠೋಪನಿಷತ್ತಿನಲ್ಲಿ `ಓಂ’ ಎಂಬುದೇ ಪರಬ್ರಹ್ಮನೆಂದು ಯಮ ನಚಿಕೇತನಿಗೆ ಉಪದೇಶಿಸಿದನು. ಮಂಡಕೋಪನಿಷತ್ತಿನಲ್ಲಿ `ಓಂ’ ಜಪವನ್ನು ನಿರಂತರ ಮಾಡುವುದರಿಂದ ಆತ್ಮನನ್ನು ಪರಬ್ರಹ್ಮನೊಂದಿಗೆ ಐಕ್ಯ ಮಾಡಬಹುದೆನ್ನಲಾಗಿದೆ. ಗೀತೆಯಲ್ಲಿ ಕೃಷ್ಣ `ನಾನು’ ಶಬ್ದಗಳಿಗೆಲ್ಲ `ಓಂ’ಕಾರ ಎಂದಿದ್ದಾನೆ. ಎಲ್ಲ ಬಗೆಯ ಧಾರ್ಮಿಕ ಕಾರ್ಯಗಳು `ಓಂ’ಕಾರದಿಂದಲೇ ಆರಂಭವಾಗುತ್ತದೆ. ನಿರಂತರ `ಓಂ’ಕಾರ ಜಪದಿಂದ ಸಮಾಧಿ ಸ್ಥಿತಿ ಲಭಿಸುತ್ತದೆ.

`ಓಂ’ಕಾರದ ಅರ್ಥಭಗವಂತನ ಮೂರು ಕಾರ್ಯಗಳನ್ನು `ಓಂ’ಕಾರ ಒಳಗೊಂಡಿದೆ. ಅ+ಉ+ಮ ಸೇರಿ `ಓಂ’ ಎನಿಸುತ್ತದೆ. `ಅ’ ಪ್ರಾರಂಭ-ಸೃಷ್ಟಿ ಅದಿಮತ್ವವನ್ನು; `ಉ’ ಸ್ಥಿತಿ-ಪ್ರಗತಿ-ಉತ್ಕರ್ಷವನ್ನು; `ಮ’ ಅಂತ್ಯ-ಮಿತಿಯನ್ನು ಸೂಚಿಸುತ್ತದೆ. ಅ-ಎಚ್ಚರ(ಜಾಗೃತ), ಉ-ಕನಸು(ಸ್ವಪ್ನ), ಮ-ಆಳವಾದ ನಿದ್ರೆ(ಸುಷುಪ್ತಿ)ಯನ್ನು ನಿರ್ದೇಶಿಸುತ್ತದೆ. ಮೂರೂ ಒಂದಕ್ಕೊಂದು `ಓಂ’ಕಾರ ಮಂತ್ರ ಉಚ್ಚಾರ ಮಾಡುವುದರಿಂದ ಆಂತರಿಕ ಅಂಗಾಂಗ ಗಳಿಗೆ ಪ್ರಚೋದನೆ ದೊರೆಯುತ್ತದೆ. ಇದರಿಂದ ವಿಶೇಷ ತರಂಗಗಳ ಕಂಪನ ಗಳುಂಟಾಗುತ್ತವೆ. ಕಂಪನ ನರನಾಡಿಗಳನ್ನು ಆವರಿಸುತ್ತಿದ್ದಂತೆ ದಿವ್ಯ ತೇಜಸ್ಸು, ಆತ್ಮವಿಶ್ವಾಸ, ಧೈರ್ಯ ಹೆಚ್ಚುತ್ತದೆ. `ಓಂ’ಕಾರಕ್ಕೆ ನಮ್ಮ ಚಂಚಲಚಿತ್ತ ಮನಸ್ಸನ್ನು ಕೇಂದ್ರೀಕರಿಸುವ ಶಕ್ತಿ ಇದೆ ಎಂಬುದನ್ನು ವಿಜ್ಞಾನಿಗಳೂ ಒಪ್ಪಿದ್ದಾರೆ.

`ಓಂ’ ಸಂಸ್ಕøತ, ಹಿಂದಿ ಭಾಷೆ ಪದವೆಂದರೂ ಎಲ್ಲ ದೇಶ, ಕಾಲಗಳಲ್ಲಿಯೂ ಅರ್ಥವಾಗುವ ಸಂಕೇತ. ಈ ಮೂರೂ ಗೆರೆಗಳಲ್ಲಿ ಮೇಲಿನದು ಸಾತ್ವಿಕ, ಎರಡನೆಯದು ರಜೋ, ಮೂರನೆಯದು ತಮೋಗುಣ. ಈ ಮೂರು ಗುಣಗಳ ನಾಭಿಯಿಂದ ಪ್ರಕೃತಿ ಎನ್ನುವುದು ವ್ಯಾಪ್ತವಾಗಿ ಹೊರಬಂದಿರುವುದರ ಚಿಹ್ನೆ. ಎಲ್ಲ ಜೀವಿಗಳೂ ಈ ಮೂರೂ ಗುಣಗಳನ್ನು ಹೊಂದಿರುತ್ತವೆ.`ಓಂ’ಕಾರದಲ್ಲಿ ತ್ರಿಮೂರ್ತಿ ತತ್ವವಿದೆ. `ಓಂ’ಕಾರದಲ್ಲಿರುವ ಅ,ಉ,ಮ-ಕಾರಗಳು ಬ್ರಹ್ಮ, ವಿಷ್ಣು, ಮಹೇಶ್ವರರನ್ನು ಸಂಕೇತಿಸುತ್ತವೆ. ಇವುಗಳಿಂದಲೇ ಜಗತ್ತು ನಿರ್ಮಾಣವಾಗಿದೆ.



`ಓಂ’ಕಾರ ಪಠಿಸುವಾಗ `ಮ’ ನಾದ ಇರುತ್ತದೆ. ಈ ಬಿಂದುವನ್ನು ದಾಟಿದ ನಂತರ ಏನೂ ಇರುವುದಿಲ್ಲ. `ಓಂ’ಕಾರ ಉಚ್ಚಾರದ ಬಳಿಕ ಉಳಿಯುವುದ ಮೌನಸ್ಥಿತಿ. ಈ ಹಂತದಲ್ಲಿ ಪ್ರಜ್ಞೆಯ ಒಳಮುಖವೂ ಅಲ್ಲ, ಹೊರಮುಖವೂ ಅಲ್ಲ. ಅರಿವು ಮತ್ತು ಅರಿವಿನ ಅನುಪಸ್ಥಿತಿ ಮೀರಿರುತ್ತದೆ. ಶ್ರೀಶಂಕರರ ಭಾಷ್ಯದಲ್ಲಿ ಸೂರ್ಯನೇ ಸೃಷ್ಟಿಗೆ ಕಾರಣ. ಪ್ರಪಂಚ ಸೃಷ್ಟಿಸಿ, ಅದನ್ನು ಪ್ರವೇಶಿಸುವವನು. ಚರಾಚರ ಜಗತ್ತಿನಲ್ಲೆಲ್ಲ ಓತಪ್ರೋತವಾಗಿರುವವನೇ ಸೂರ್ಯಬ್ರಹ್ಮ. ವೇದವು `ಓಂ’ಕಾರವನ್ನು ಸರ್ವಶ್ರೇಷ್ಠ-ಜಪ-ತಪ-ಧ್ಯಾನವೆಂದಿದೆ. ಸಮಸ್ತ ಮಂತ್ರಗಳ ಶಿರೋಮಣಿ `ಓಂ’ಕಾರ. ಓಂಕಾರ ಸ್ಮರಣ, ಕೀರ್ತನ, ಶ್ರವಣ, ಜಪದಿಂದ ಮನುಷ್ಯನಿಗೆ ಪರಬ್ರಹ್ಮ ಪ್ರಾಪ್ತಿಯಾಗುತ್ತದೆ. ಬ್ರಹ್ಮಾಂಡದಲ್ಲಿ ಇರುವುದೆಲ್ಲವೂ `ಓಂ’ಕಾರ. ಭೂತ, ವರ್ತಮಾನ, ಭವಿಷ್ಯತ್‍ಗಳನ್ನು ಮೀರಿದ, ಕಾಲವೇ ಲಯವಾಗುವಂತಹ ಕಾಲಾತೀತ ಶಕ್ತಿ. ಸೃಷ್ಟಿ ಸ್ಥಿತವಾಗುವುದು, ಲಯವಾಗುವುದೂ `ಓಂ’ಕಾರವೇ. ಒಂದು ಲಯವಾದಾಗ ಇನ್ನೊಂದು ಸೃಷ್ಟಿಯಾಗಬೇಕು. ಎರಡೂ ಒಂದರೊಳಗೊಂದು ಬೆಸದುಕೊಂಡಿದೆ. ವಿಜ್ಞಾನಿಗಳು ಕೂಡ ಮಹಾಸ್ಫೋಟ ಎಂಬ ಲಯದಲ್ಲಿ ಸೃಷ್ಟಿಯನ್ನು ಕಂಡುಕೊಳ್ಳುತ್ತಾರೆ. ಇದರಿಂದ ಸೃಷ್ಟಿ ರಹಸ್ಯ ಭೇದಿಸಲಾಗದು; ಲಯವನ್ನು ಅರ್ಥ ಮಾಡಿಕೊಳ್ಳಬೇಕು. ಇದಕ್ಕೆ ಕಾಲಘಟ್ಟದಲ್ಲಿ ಆಗುವ ಬದಲಾವಣೆ ಬಗ್ಗೆ ಮನದಟ್ಟು ಮಾಡಿಕೊಳ್ಳಬೇಕು.

Also Read: ತಿರುಪತಿ ತಿಮ್ಮಪ್ಪನ ಮೂರ್ತಿಯ 9 ವಿಸ್ಮಯಗಳು